ပြည်မြို့နယ်တွင် တစ်ကိုယ်တော် တစ်နှစ်လျှင် အနည်းဆုံး သစ်ပင်ပေါင်း ငါးရာစိုက်ပျိုးလာရာ ယခုဆိုလျှင် သစ်ပင်ပေါင်း ငါးထောင်အထိဖြစ်ပေါ်လာခဲ့
ပြည်၊ဇွန်၊၁၄
ပဲခူးတိုင်းဒေသကြီး၊ပြည်ခရိုင်၊ပြည်မြို့နယ်အတွင်းမှာ အသက် ၇၅-နှစ်အရွယ်အဘတစ်ဦးဟာ တစ်နှစ်လျှင် အနည်းဆုံးသစ်ပင်ပေါင်း ငါးရာစိုက်ပျိုးလာခဲ့ရာ တစ်ကိုယ်တော်သစ်ပင်စိုက်ပျိုးလာမှုသည် ယနေ့ဆိုလျှင် အပင်ပေါင်း ငါးထောင်ကျော်အထိစိုက်ပျိုးပြီးစီးနေပြီဖြစ်ကြောင်းသိရသည်။
အဆိုပါ သစ်ပင်များစိုက်ပျိုးလာရခြင်းသည် သဘာဝဘေးအန္တရာယ်တွေနှင့် ရာသီဥတုကောင်းမွန်လာစေရေးအပါဝင် သစ်ပင်စိမ်းစိမ်းစိုစိုတွေမြင်ရတာလောက် စိတ်ချမ်းသာမှုမရှိဘူးဟု ဆိုသည့် ပညာရေးဝန်ထမ်းဟောင်းတစ်ဦးဖြစ်သည့် ကျောင်းဆရာကြီး အဘ ဦးဝင်းရွှေ-က အသက် ၆၀-ခန့်မှာ အငြိမ်းစားပင်စင်ယူစဉ်ကတင်၍ တစ်နှစ်လျှင် အနည်းဆုံးသစ်ပင်ပေါင်း ၅၀၀-ခန့်စိုက်ပျိုးလာခဲ့ရာ ယခု အသက် ၇၅-နှစ်အရွယ်မှာ အပင်ပေါင်း ၅၀၀၀-ကျော်စိုက်ပျိုးပြီးစီးသွားပြီဖြစ်ကြောင်းသိရသည်။
“ သစ်ပင်တွေ စစိုက်တုန်းက အပင် ငါးဆယ်လောက်ကို ဆိုက်ကယ်ပေါ်တင် သယ်လာပြီးစိုက်ရတာ။ နောက်ပိုင်းတော့ သားသမီးတွေက အန္တရာယ်များလို့ဆိုပြီး ပျိုးပင်တွေကားနဲ့လိုက်ပို့ပေးတယ်။ တနှစ်ကို အပင် ငါးရာအနည်းဆုံး စိုက်ဖြစ်တယ်။ အခုဆို ငါးထောင်ကျော်ပြီ၊ အဓိက သဘာဝဘေးအန္တရာယ်တွေ၊ရာသီဥတုဒဏ်တွေကိုကာကွယ်တဲ့အနေနဲ့ ရှေ့ဆောင်လမ်းပြခဲ့တာ။ကိုယ်စိုက်ပျိုးပြီး ဖြစ်ထွန်းလာတဲ့အပင်စိမ်းစိမ်းစိုစိုတွေကို မြင်ရတော့ စိတ်ချမ်းသာတယ်။ ကိုယ်စိုက်တဲ့အပင်တွေကိုယ် ပြန်ကြည့်ရတာလောက် စိတ်ချမ်းသာတာမရှိဘူး။ယူကလစ်ပင်တွေတော့မစိုက်တော့ဘူး မြေဆီလွှာတွေကိုဖျက်စီးတယ်လို့သိရတော့ ပြန်ရှင်းပစ်တော့မယ်။” ဟု ပြည်မြို့မှ အဘဦးဝင်းရွှေ-ကပြောသည်။
အဆိုပါ တစ်ကိုယ်တော် သစ်ပင်စိုက်မှုကို ရှေးဟောင်းဇုန်တစ်ခုဖြစ်သည့် မှော်ဇာကျေးရွာ နှင့် ဆင်မြီးဆွဲကျေးရွာကြားမှာရှိသည့် မုဋ္ဌောကျေးရွာမှာ ရှေးနှစ်ပေါင်းတစ်ရာကျော်လောက်က ရှိခဲ့တဲ့ လက်သည်းရေကန် ဘုန်းတော်ကြီး(တောင်ကျောင်း)ဝန်းအတွင်းနှင့် ပြင်ပနေရာတွေမှာ စိုက်ပျိုးလာခဲ့တာဖြစ်ပြီး ယင်းဘုန်းကြီးကျောင်းကြီးတွေ ပြုပြင်ထိန်းသိမ်းဖို့ လိုအပ်တဲ့အခါ သစ်တွေအဖြစ်အသုံးပြုနိုင်အောင် စိုက်ပျိုးခဲ့တာဖြစ်တယ်လို့ လက်သည်းရေကန်ဘုန်းတော်ကြီး(တောင်ကျောင်း)ကျောင်းထိုင်ဆရာတော်ထံကသိရသည်။
“ ဒီဘုန်းကြီးကျောင်းက အဘရဲ့ အဘေးဆောက်ခဲ့တာ နှစ်တစ်ရာကျော်ရှိပြီ၊ ဒါတွေပြုပြင်တဲ့အခါ သစ်တွေလိုရင် ဒီသစ်ပင်တွေသုံးလို့ရအောင် ဒီကျောင်းနားမှာစိုက်တာပါ။ သဘာဝပတ်ဝန်းကျင်လည်း ထိန်းသိမ်းချင်တာလည်းပါတယ်။ အခုတော့ ဒီနားကမြေလွတ်တွေမှာစိုက်ဖို့ စီစဉ်ထားတာ စိုက်မရတော့ဘူး၊ ရှေးဟောင်းသုတေသနဋ္ဌာနက စိုက်ခွင့်မပေးတော့ဘူး။” လို့ စိတ်မကောင်းစွာနဲ့ သူသစ်စိုက်ပျိုးခွင့်မရတဲ့အပေါ် အဘ-ဦးဝင်းရွှေ-ကရှင်းပြောသည်။
အဆိုပါ သစ်ပင်တွေစိုက်ပျိုးခွင့်မရလို့ စိတ်မကောင်းဖြစ်ရပြီး သူစိုက်ပျိုးခဲ့သည့် နေရာဟာ လွန်ခဲ့တဲ့ တစ်နှစ်ကျော်လောက်က ယူနက်စကိုအသိအမှတ်ပြုခံရတဲ့ သီရိခေတ္တရာရှေးဟောင်းဇုန်းထဲမှာ ဖြစ်နေတဲ့အတွက် ရှေးဟောင်းဇုန်းရဲ့ ဥပဒေအရ ၆ ပေအထက်မြင့်တဲ့ သစ်ပင်တွေကို ထပ်မံစိုက်ပျိုးခွင့်မပြုတော့လို့ပဲဖြစ်တယ်လို့သိရသည်။
“ အဘလို အသက် ၇၅ နှစ်အရွယ်ကြီးကတောင် ကိုယ်နိုင်သလောက်သစ်ပင်တွေစိုက်နေကြတာပဲ၊ လူငယ်တွေ၊ လူလတ်ပိုင်းတွေပါမကျန် အကုန်းလုံးသစ်ပင်စိုက်စေချင်တယ်။ သန်း ၅၀ ကျော်က တယောက်တပင်စိုက်ရင်တောင် အပင် သန်း ၅၀ ကျော်ရှိသွားမှာပါ။ အခုရှေးဟောင်းဇုန်းထဲစိုက်ချင်ပေမဲ့ စိုက်မရတော့ တခြားမြေလွတ်တဲ့နေရာတွေရှိရင် စိုက်ချင်ပါသေးတယ်။”ဟု အဘဦးဝင်းရွှေ-ကပြောသည်။
မြန်မာနိုင်ငံအတွင်း ရာသီဥတုသိသိသာသာပြောင်းလဲလာမှုကြောင့် သစ်ပင်တွေ များများစိုက်ပျိုးဖို့လိုအပ်နေပြီး၊ မြေနေရာလွတ်များရှိပါက သစ်ပင်တွေ စိုက်ပေးလိုကြောင်းနဲ့ မြန်မာနိုင်ငံသားတွေ သစ်ပင်စိုက်ကြဖို့ကို သူကတိုက်တွန်းပြောဆိုခဲ့ပါတယ်။ အဆိုပါ အဘ-ဦးဝင်းရွှေ စိုက်ပျိုးလာသည့် သစ်ပင်အမျိုးအစားများမှာ သစ်မာအမျိုးအစားတွေဖြစ်သည့် ကျွန်း၊ ပျဉ်းကတိုး၊ မဟော်ဂနီ၊တောကုက္ကို နှင့် တောပိတောက်၊ယူကလစ်၊ယင်းမာပင် စုစုပေါင်း ၅၀၀၀ ကျော်ထဲတွင် အများဆုံးက ကျွန်းပင်တွေဖြစ်ပြီး၊ ပျိုးပင်တွေကို ဝယ်ယူပြီ တပိုင်တနိုင် စိုက်ပျိုးခဲ့တာဖြစ်ကြောင်းသိရသည်။
ဒီမိုကရေစီတူဒေးသတင်းစာ-K3(pyay)
ပြည်သတင်းလူငယ်-ပြည်သတင်း(၀၉-၂၅၃၃၁၁၀၁၉)
0 comments:
Post a Comment