ပြည်မြို့နယ်လုံးဆိုင်ရာ မီးဘေး နှင့် သဘာဝဘေးအန္တရာယ်တားဆီးကာကွယ်ရေး နှင့် ကူညီကယ်ဆယ်ရေးကွန်ယက်ဖွဲ့စည်း
ပြည်၊ဖေဖော်ဝါရီ၊၂၅
ပဲခူးတိုင်းဒေသကြီး ပြည်ခရိုင် ပြည်မြို့တွင် ဖေဖော်ဝါရီ ၂၅ ရက်နေ့ နေ့လည် ၁-နာရီအချိန်မှ စတင်ကာ ပြည်မြို့နယ်လုံးဆိုင်ရာ မီးဘေး နှင့် သဘာဝဘေးအန္တရာယ်တားဆီးကာကွယ်ရေး နှင့် ကူညီကယ်ဆယ်ရေးကွန်ယက် ဖွဲ့စည်းခြင်းအခမ်းအနားအား ပြည်မြို့ ဆံတော်ရပ် ရွှေသာလျောင်းဘုရားလမ်း အောင်ပွဲဝင်မင်္ဂလာခန်းမတွင် ကျင်းပပြုလုပ်ခဲ့ကြောင်းသိရသည်။
အဆိုပါ လူမှုရေးအသင်းအဖွဲ့များ နှင့် နိုင်ငံရေးတက်ကြွစိတ်ပါဝင်စားသူများပါဝင်သည့် ကွန်ယက်ဖွဲ့စည်းခြင်းကိစ္စမှာ မြန်မာနိုင်ငံတစ်ဝှမ်းတွင် အယ်နီညိုရာသီဥတုကြောင့်ဖြစ်စေ၊သဘာဝအန္တရာယ်ကြောင့်ဖြစ်စေ၊လူတို့၏ ပယောဂဖန်တီးမှုကြောင့်ဖြစ်စေ၊မီးဘေးများမကြာမဏဆိုသလို ကျရောက်နေသဖြင့် ပြည်မြို့နယ်ကိုလည်း ဤသို့မီးဘေးအန္တရာယ်မကျရောက်စေရန် လူမှုရေးအသင်းအဖွဲ့များ နှင့် နိုင်ငံရေးတက်ကြွလှုပ်ရှားသူများ စုပေါင်း၍ ယခုလိုကွန်ယက်ဖွဲ့စည်းလုပ်ဆောင်သွားမည်ဖြစ်ကြောင်းသိရသည်။
“ထူးထူးဆန်းဆန်းမီးဘေးအန္တရာယ်တွေမြန်မာနိုင်ငံအတွင်းမှာဖြစ်ပေါ်နေတယ်။ဖြစ်ပေါ်တဲ့နေရာတိုင်းက ဈေးကြီးတွေနဲ့ဈေးတွေအနီးမှာရှိနေတဲ့နေအိမ်တွေမှာမီးဘေးတွေကျရောက်နေတယ်။ကျွန်တော့တို့မိတ်ဆွေတွေနဲ့ လက်ဖက်ရည်ဆိုင်ထိုင်ရင်း ဒီမီးဘေးကိစ္စတွေပြောဖြစ်ရင်းနဲ့ ဒီလိုကွန်ယက်ဖွဲ့ဖို့ဆွေးနွေးခဲ့ကြတာပါ။သဘာဝဘေးအန္တရာယ်ကြောင့်ပဲဖြစ်ဖြစ်၊လူတွေဖန်တီးတဲ့ ပယောဂဖန်တီးမှုတစ်ခုဖြစ်ဖြစ် ကောလဟာလဖြစ်ဖြစ် အမှန်တစ်ကယ်ဖြစ်ဖြစ် ကြိုတင်ကာကွယ်နိုင်ရေးအတွက်အသင်းအဖွဲ့ပေါင်းစုံပါဝင်ဖွဲ့စည်းပြီး ကွန်ယက်ဖွဲ့ခဲ့ကြပါတယ်။ကျန်နေသေးတဲ့မြို့ရွာတွေမှာလည်း ကျွန်တော်တို့လို ကွန်ယက်ဖွဲ့စည်းဖို့တိုက်တွန်းပေးခြင်ပါတယ်။” ဟုအဆိုပါအခမ်းအနားဖြစ်မြောက်အောင်ဆောင်ရွက်သူတစ်ဦးဖြစ်သည့် ဦးအေးလွင်ကပြောသည်။
အဆိုပါကွန်ယက်ဖွဲ့စည်းရခြင်းမှာ ပြည်မြို့သူ/သားများ၏ အသက်အိုးအိမ်စည်းစိမ်အား ထိခိုက်ဝါးမျိုမည့် မီးဘေးအန္တရာယ်အား စုပေါင်းကြိုတင်ကာကွယ်တားဆီးနိုင်ရေး၊ယခုကဲ့သို့လုပ်ဆောင်ချက်များအား မီဒီယာမှတဆင့် အများပြည်သူသိစေခြင်းဖြင့် ကိုယ်ပိုင်အသိစိတ်ဓာတ်များရှင်သန်လာပြီး မီးဘေးကာကွယ်မှုများ အိမ်တိုင်းပြုလုပ်လာစေရေး၊စိတ်ပိုင်းဆိုင်ရာ အသင့်ပြင်ဆင်မှုရရှိလာစေရေး၊မီဒီယာမှတဆင့် တစ်နိုင်ငံလုံးသိရှိပြီး အခြားမြို့ရွာများတွင်လည်း အလားတူအသင်းအဖွဲ့များပေါ်ပေါက်လာ၍ ပြည်သူ့အကျိုးများ ကာကွယ်စောင့်ရှောက်လာနိုင်စေရေး စသည့်ရည်ရွယ်ချက်များဖြင့် ကွန်ယက်ဖွဲ့စည်းရခြင်းဖြစ်ကြောင်းသိရသည်။
“မီးဘေးအန္တရာယ်ကို ကာကွယ်ချင်တဲ့အထိမ်းအမှတ်အနေနဲ့ဖွဲ့စည်းခဲ့ကြတာ။အခုဖြစ်ပေါ်နေတဲ့ မီးလောင်မှုတော်တော်များများမှာ ဈေးကြီးတွေမှာ မီးလောင်မှုများပြားနေခဲ့တယ်။ ပြည်မြို့မဈေးကြီးမှာဆို ဈေးဆိုင်းခန်းပေါင်း ၁၈၀၀-ခန့်ရှိနေတယ်။ ဒီဈေးကြီးကို မှီခိုစားသောက်နေထိုင်နေမှုတွေအများကြီးပဲ။ကျန်တဲ့ဈေးလေးတွေလည်းရှိပါတယ်။ကောလဟာလတွေဆိုတာကလည်း တစ်ခါတလေမှန်နေတတ်တယ်။လုံခြုံရေးအရ ညစဉ်ညတိုင်းကင်းလှည့်တာတွေလုပ်သွားမယ်။ကင်းလှည့်ဖို့အတွက် ကျွန်တော်တို့ ဆီကကားတွေထုတ်သုံးပေးမယ်။မီးလောင်ခဲ့ရင် ကျွန်တော်တို့က ရေသယ်ပေးတဲ့အဆင့်လောက်ပဲရှိပါမယ်။မီးငြိမ်းသတ်ရမှာက မီးသတ်ဌာနတွေအဓိကလုပ်ဆောင်နေကြတယ်။ကျွန်တော်တို့က ကြိုတင်ကာကွယ်တားဆီးနိုင်အောင်ဆောင်ရွက်သွားကြမှာပါ။ဒီလိုပြုလုပ်ပေးခြင်းအားဖြင့် မလိုလားအပ်တဲ့ ရှို့မီးတွေလျော့ကျသွားနိုင်တယ်။ကုသခြင်းထက် ကြိုတင်ကာကွယ်ခြင်းကပိုမိုထိရောက်ပါတယ်။” ဟု မိုးမေတ္တာနာရေးကူညီမှုအသင်း အတွင်းရေးမှူး ဦးညီညီအောင် ကပြောသည်။
အဆိုပါကွန်ယက်သည် မီးဘေးအန္တရာယ်တားဆီးကာကွယ်ရေးလုပ်ငန်းများ နှင့် သဘာဝဘေးအန္တရာယ်ဆိုင်ရာကိစ္စများအား ကြိုတင်ကာကွယ်တားဆီးရေးလုပ်ငန်းများနှင့်ကူညီကယ်ဆယ်ရေးလုပ်ငန်းများကို လူမှုရေးအသင်းအဖွဲ့များ၊နိုင်ငံရေးတက်ကြွလှုပ်ရှားသူများ၊မြို့မိမြို့ဖများ၊စေတနာ့ဝန်ထမ်းများ၊အစိုးရအဖွဲ့အစည်းများ၊သန္ဓေမီးသတ်များ၊အရံမီးသတ်များ စသည့်အဖွဲ့အစည်းများဖြင့် ပှုးပေါင်းပါဝင်ဆက်သွယ်၍ မီးဘေးအန္တရာယ်တားဆီးကာကွယ်ရေးလုပ်ငန်းများ နှင့် သဘာဝဘေးအန္တရာယ်ဆိုင်ရာကိစ္စများအား ကြိုတင်ကာကွယ်တားဆီးရေးလုပ်ငန်းများနှင့်ကူညီကယ်ဆယ်ရေးလုပ်ငန်းများကို ဆောင်ရွက်သွားမှာဖြစ်ပြီး အဆိုပါအခမ်းအနားကို ပြည်မြို့အတွင်းရှိ လူမှုရေးအသင်းဖွဲ့များ၊နိုင်ငံရေးတက်ကြွလှုပ်ရှားကြသူများ၊မြို့မိမြို့ဖများ စုစုပေါင်းအင်အား ၁၀၀-ခန့်တက်ရောက်ခန့်ကြောင်းသိရပြီး ကော်မတီအသီးသီးဖွဲ့စည်း၍ ပြည်မြို့နယ်လုံးဆိုင်ရာ မီးဘေး နှင့် သဘာဝဘေးအန္တရာယ်တားဆီးကာကွယ်ရေး နှင့် ကူညီကယ်ဆယ်ရေးကွန်ယက်ဖွဲ့စည်းသွားခဲ့ကြောင်းသိရသည်။
K3(pyay)ဒီမိုကရေစီတူဒေးသတင်းစာ
ပြည်သတင်းလူငယ်
09253311019
0 comments:
Post a Comment