Friday, July 31, 2015
နတ်တလင်းမြို့အတွင်း ရေကြီးရေလျှံရေနစ်မြုပ် ငါးကန်များပျက်စီး လေပြင်းတိုက်ခိုက်ခံရ ပျက်စီးဆုံးရှုံးမှုအင်မတန်များ
နတ်တလင်းမြို့အတွင်း ရေကြီးရေလျှံရေနစ်မြုပ် ငါးကန်များပျက်စီး လေပြင်းတိုက်ခိုက်ခံရ ပျက်စီးဆုံးရှုံးမှုအင်မတန်များ
ပြည် သြဂုတ် ၁
ပဲခူးတိုင်းဒေသကြီးသာယာဝတီခရိုင်နတ်တလင်းမြို့နယ်အတွင်းဇူလိူင်၂၈ရက်နေ့မှမိုးကြီးစွာရွာသွန်းမှုများကြောင့်မြို့ပေါ်ရပ်ကွက်တချို့နှင့်ကျေးရွာ၁၀ရွာကျော်တွင်အဆက်မပျက်ရွာသွန်းလျှက်ရှိသောမိုးများကြောင့်လည်းကောင်း၊ရေနုတ်မြောင်းများမှစီးဝင်သည့်ရေများနှင့်မြစ်ရေထောက်မှုများကြောင့်ရေကြီးရေလျှံမှုများဖြစ်ပေါ်လျှက်ရှိပြီး ကျေးရွာနေအိမ်များရေနစ်မြုပ်၍ ငါးမွေးမြူရေကန်ပေါင်း(၁၀၀)ခန့်ပျက်စီးဆုံးရှုံးသွားခဲ့ပြီး ဇူလိူင် ၂၉-ရက်နေ့တွင် ထပ်မံ၍ မိုးကြီးစွာရွာသွန်းခဲ့ပြီး လေပြင်းတိုက်ခိုက်မှုကြောင့်အဆိုပါမြို့နယ်အတွင်းရှိ ဒမငယ်(အ.မ.က) နှင့် ဆီဆုံကုန်းအုပ်စု ရွာသာယာ(အ.မ.က)စာသင်ကျောင်း(၂)ကျောင်း၊ နှင့် ဒမငယ်ကျေးရွာအုပ်စု၊ဆီဆုံကုန်းကျေးရွာအုပ်စု၊စောင်းဝှက်ကျေးရွာအုပ်စု၊အောင်ရတနာကျေးရွာအုပ်စုများအတွင်းရှိ အိမ်ခြေ(၁၁၁)လုံးပြိုလဲ၊အမိုးလန် ပျက်စီးဆုံးရှုံးသွားခဲ့ကြောင်းသိရသည်။
ဇူလိူင် ၂၈-ရက်နေ့မှ မိုးကြီးစွာရွာသွန်းမှုများကြောင့် အဆိုပါမြို့နယ်အတွင်းရှိ မြို့ပေါ်ရပ်ကွက်များဖြစ်သော သာစည်၊ရွာမ၊ဇီးကုန်းလေး၊နှင့်မြို့မ၊ရပ်ကွက်များအပါဝင်အားကစားဘောလုံးကွင်းများ၊စာသင်ကျောင်းများအတွင်းသို့ရေကြီးရေလျှံမှုများဖြစ်ပေါ်လျှက်ရှိခဲ့ပြီးကုန်းသာအုပ်စု၊ပျဉ်းမကုန်းအုပ်စု၊တောင်ယာတောအုပ်စု၊ရေမွှေးအုပ်စု၊ကျောင်းရွာလေးအုပ်စုများအတွင်းရှိကျေးရွာများဖြစ်သောပေါက်မှော်၊လေးအိမ်တန်း၊မရင်းပျဉ်၊တောင်ယာတော၊ရေမွှေးရွာ၊ကြို့ပင်အင်း၊ကျောင်းရွာလေး၊ပုဇွန်ချောင်းစသည့်ကျေးရွာများအတွင်းနေအိမ်များရေနစ်မြုတ်လျှက်ရှိပြီးငါးမွေးမြူရေးကန်ပေါင်း(၁၀၀)ခန့်နှင့်လယ်မြေဧကပေါင်း(တစ်သောင်းခွဲ)ခန့်ရေနစ်မြုပ်ပျက်စီးလျှက်ရှိကြောင်းသိရသည်။
“စားစရာရော နေစရာပါကျန်းမာရေးတွေကအစအကုန်လုံးအခက်အခဲတွေကြုံနေရပြီ။အခုရေနစ်မြုပ်နေတဲ့ရွာတွေမှာဘယ်သူမှမနေတော့ဘူး။ရေလွတ်ရာမိဘနဲ့ဆွေးမျိုးတွေဆီပြောင်းနေရတယ်။အစိုးရလည်းမကူညီသေးဘူး။အသင်းအဖွဲ့လည်းမကူညီသေးဘူး။ဘယ်ပါတီမှမကူညီသေးတာ။ပျက်စီးဆုံးရှုံးတာတွေတွက်လို့တောင်မရဘူး။မြင်တဲ့အတိုင်းပဲ နေရာတိုင်းရေက လည်ပင်းထိရောက်နေပြီ။တိုတိုနဲ့လိုရင်းပြောရရင် စိုက်ပျိုးစရိတ်ဘဏ်ချေးငွေဆပ်ချိန်ကျရင်အစိုးရအနေနဲ့ဒုက္ခရောက်နေတဲ့ကျွန်တော်တို့တောင်သူတွေကိုပြန်ကြည့်ပြီးကူညီပေးပါလို့တောင်းဆိုချင်ပါတယ်။”ဟု ကုန်းသာအုပ်စုကျေးရွာနေထိုင်သူ ကိုဌေးအောင် မှပြောသည်။
အဆိုပါ ကျေးရွာနေအိမ်များရေနစ်မြုပ်မှု့တွင် နွား၊ကြက်၊ဘဲ စသည့်အိမ်မွေး သတ္တ၀ါများအား ပစ်ထားခဲ့ရပြီး ညပိုင်းမိမိတို့နေအိမ်တချို့သို့လှေငယ်များဖြင့်သွားရောက်ကာအစောင့်အနေဖြင့်အိမ်သားတစ်ဦးမှစောင့်ဆိုင်းအိပ်ရပြီး နေအိမ်များအတွင်းသို့ မြွေများမကြာခဏ၀င်ရောက်လျှက်ရှိကြောင်းသိရသည်။
“ကျွန်တော်တို့တွေ ကျေးရွာငါးရွာနဲ့ တာပွန်တိုက်နယ်မှာရှိနေတဲ့ ရေဘေးသင့်ပြည်သူတွေကို ၃၁-ရက်နေ့က တစ်အိမ်ထောင် ဆန်လေးပြည် နဲ့ ခေါက်ဆွဲခြောက်ထုပ်တွေအပါဝင် လိုအပ်တဲ့ဆေးဝါးကူညီမှုပေးပြီးသွားပါပြီ။ ကျတော်က အမှတ်(၁)မဲဆန္ဒနယ်ဖြစ်လို့ လေဘေးသင့်တဲ့ ဒမငယ်ဘက်က အမှတ်(၂)မဲဆန္ဒရှင်လောက်တော့လေဘေးအကြောင်းသေချာမရှင်းပြနိုင်သေးပါဘူး။ ကျန်ရှိနေတဲ့ရေဘေးပြည်သူတွေကိုလည်း စာရင်းများကောက်ယူနေပါတယ်။ဒီနေ့လည်းကျန်နေသေးတဲ့ကျေးရွာတွေကို ဆန်နဲ့ခေါက်ဆွဲခြောက်တွေအပါဝင် လိုအပ်တဲ့ဆေးဝါးကူညီမှုတွေသွားပေးမှာပါ။ရေကတော့နည်းနည်းပြန်ကျနေပါပြီ။တော်တော်လေးရေပြန်ကျချိန်ကျရင် စာသင်ကျောင်းတွေမှာလည်း ကျန်းမာရေးအတွက်ဆေးဖြန်းမှုတွေဆက်လက်ဆောင်ရွက်သွားမှာပါ။” ဟု အမှတ်(၁)မဲဆန္ဒနယ် တိုင်းဒေသကြီးလွှတ်တော်ကိုယ်စားလှယ် ဦးတင့်လွင် မှပြောသည်။
ယခုကဲ့သို့ ဆုံးရှုံးမှုများဖြစ်ပေါ်လျှက်ရှိရာကျေးရွာအတွင်းရှိကျောင်းသား/သူများသွားလာရေးခက်ခဲမှုများကြောင့် ကျောင်းမတက်နိုင်ခြင်း၊ကျန်းမာရေးအခြေအနေရဖျားနာခြင်း၊သောက်သုံးရေရှားပါးခြင်း၊မြွေအန္တရာယ်များစွာကြုံတွေ့နေရခြင်း၊ကျန်းမာရေးစောင့်လျှောက်မှု့များမရှိသေးခြင်းများနှင့်လယ်တစ်ဧကလျှင်တစ်သိန်းနူန်းဖြင့်ဘဏ်တိုးချေးငွေထုတ်ယူထားသည့်ဒေသခံတောင်သူများအနေဖြင့်ဘဏ်ချေးငွေယခုနှစ်ပြန်လည်ပေးဆပ်နိုင်ရန်အခက်ခဲများစွာဖြစ်ပေါ်လျှက်ရှိနေပြီးသြဂုတ်လ(၁)ရက်နေ့ထိမည်သည့်ဌာန၊အသင်းအဖွဲ့အစည်း၊ပါတီများလာရောက်ကူညီခြင်းမရှိသလိုရေကြီးနစ်မြုပ်မှုများဆက်လက်ဖြစ်ပေါ်လျှက်ရှိပြီးလေပြင်းတိုက်ခိုက်ခံရသည့်ကျေးရွာအုပ်စုများအတွင်းရှိဒေသခံ(၂၅၄)ဦးအားနီးစပ်ရာဆွေမျိုးသားချင်းများ၊ဘုန်းတော်ကြီးကျောင်းများ၊တွင်ခေတ္တခဏတည်းခိုနိုင်ရန် လွှတ်တော်ကိုယ်စားလှယ်များ ၊ သက်ဆိုင်ရာ မြို့နယ်ထွေ/အုပ်၊ရပ်/ကျေး၊ရပ်ထောက်/ကူအဖွဲ့၊ရပ်မိရပ်ဖ များမှစီစဉ်ဆောင်ရွက်ပေးထားလျှက်ရှိကြောင်းသိရသည်။အဆိုပါလေဘေးသင့် အုပ်စုကျေးရွာအတွင်း ပညာသင်ကြားလျှက်ရှိသော ကျောင်းသား/သူ စုစုပေါင်း(၈၄)ဦးအား နီးစပ်ရာဘုန်းတော်ကြီးကျောင်းများတွင် ဆက်လက်ပညာသင်ကြားနိုင်ရန် ဖော်ပြပါ သက်ဆိုင်ရာဌာနများမှစီစဉ်ဆောင်ရွက်လျှက်ရှိကြောင်းသိရသည်။
K3(pyay)ဒီမိုကရေစီတူဒေးသတင်းစာ
တင်ဆက်..ပြည်သတင်းလူငယ်..09253311019
0 comments:
Post a Comment