ပြည်ခရိုင်အတွင်း စာသင်ကျောင်းပေါင်း ၄၀ ကျော်ရေကြီးနစ်မြုပ်၍ ယာယီပိတ်ထားလျှက်ရှိနေ
ပြည် စက်တင်ဘာ ၁၅
ပဲခူးတိုင်းဒေသကြီး ပြည်ခရိုင်အတွင်း ရေကြီးရေနစ်မြုပ်လျှက်ရှိသည့် စာသင်ကျောင်းပေါင်း ၄၀ ကျော် အား စက်တင်ဘာ ၉ ရက်နေ့မှစတင်ကာ ယာယီပိတ်သိမ်းခဲ့ကြောင်းသိရသည်။ပြည်ခရိုင်အတွင်း ပြည်၊ပန်းတောင်း၊ရွှေတောင် စသည့်မြို့နယ်အတွင်း စက်တင်ဘာ ၉ရက် နှင့် ၁၀ ရက်နေ့တို့တွင် ဧရာဝတီမြစ်ရေလျှံတက်လာမှုကြောင့် မြေနိမ့်ရပ်ကွက် နှင့်ကျေးရွာတစ်ချို့တွင် ရေကြီးနစ်မြုပ်မှုများဖြစ်ပေါ်လျှက်ရှိကြောင်းသိရသည်။
“ပထမရေကြီးချိန်က ပြင်ဆင်ချိန်မရလို့အခက်ခဲတွေအများကြီးကျော်ဖြတ်လိုက်ရတယ်။ခုကဒုတယအကြိမ်ရေကြီးတော့ ပြင်ဆင်ချိန်ရလိုက်လို့တော်သေးပါတယ်။ရေပြန်ကျချိန်မှာကျောင်းသားတွေအတွက်သောက်သုံးရေအခက်ခဲတွေကြုံရမယ်။ကျောင်းပြန်လည်ထူထောင်ရေးလုပ်ငန်းတွေအများကြီးပြန်လုပ်ရမယ်။မနက်ကတော့စာသင်သေးတယ်။စာသင်နေရင်းရေကတဖြေးဖြေးတက်လာလို့ နေ့လည်ကစပြီးကျောင်းပိတ်ထားလိုက်ရတယ်။မြို့နယ်ကိုဓါတ်ပုံနှင့်တကွတင်ပြထားပါတယ်။” ဟု အခြေခံပညာမှုလတန်း(လွန်)ကျောင်း(ခတ္ထိယ) ကျောင်းအုပ်ဆရာမကြီး ဒေါ်ယဉ်မျိုးအောင် မှပြောသည်။
ပြည်ခရိုင်အတွင်း စက်တင်ဘာ ၃ ရက် နှင့် ၄ ရက်တို့မှာ ရေကြီးရေလျှံမှုများလျော့ကျလာခဲ့ပြီး ပြန်လည်ထူထောင်ရေးလုပ်ငန်းများလုပ်ဆောင်ပြီး ရေလွှမ်းမိုးခံရသည့်နေအိမ်များသို့ ၃ ရက်ကြာနေထိုင်ခဲ့ပြီး ဒုတိယအကြိမ် ဧရာဝတီမြစ်ရေမြင့်တက်လာမှုများမှတဆင့် မြေနိမ့်ပိုင်းရပ်ကွက်ကျေးရွာနှင့်စာသင်ကျောင်းများအတွင်း ရေကြီးရေလျှံမှုများဖြစ်ပေါ်ခဲ့ရာ ပန်းတောင်းမြို့ပေါ်တွင် အထက်တန်းကျောင်း အပါဝင် ရေလယ်ကျွန်း၊ဂျင်းရဲကျွန်း၊တက်သစ်ကျွန်း၊မြစိမ်းကျွန်း စသည့်ဧရာဝတီမြစ်လယ်ရှိကျွန်းများမှ စာသင်ကျောင်းပေါင်း ၂၀ ကျော် နှင့် ရွှေတောင်မြို့တွင် ၂၂ ကျောင်း ပြည်မြို့တွင် ၁ ကျောင်း ယာယီပိတ်ထားခဲ့ရကြောင်းသိရသည်။
“အခုလက်ရှိကတော့ ပန်းတောင်း နဲ့ ရွှေတောင်ဘက်တွေမှာ စာသင်ကျောင်းတွေရေကြီးနစ်မြုပ်လို့ ကျောင်းပိတ်ထားရတဲ့အကြောင်း စာတွေတင်လာကြပြီ။ ပန်းတောင်းမှာ အထက်တန်းကျောင်းအပါဝင် ၉ ကျောင်း နဲ့ ရွှေတောင်မှ ကျောင်းပေါင်းစုံ ၂၂ ကျောင်းပိတ်ထားရတယ်ဆိုတဲ့စာတွေဝင်လာနေပါပြီ။ တက်လာတဲ့စာတွေကို ကျွန်မတို့က သက်ဆိုင်ရာဌာနအဆင့်ဆင့်ကို တင်ပြသွားမှာပါ။ကလေးတွေပညာရေးကိုတော့ ရက်ရှည်ကျောင်းပိတ်ရက်တွေ နဲ့ စနေ တနင်္ဂနွေ ဥပုလ်အဲလိုနေ့တွေမှာ အစားထိုး ခေါ်ယူသင်ကြားစနစ် နဲ့ အချိန်ပိုခေါ်ယူသင်ကြားစနစ်တွေနဲ့ ပြန်လည်သင်ကြားပေးသွားမှာပါ။ ” ဟု ပြည်ခရိုင် ပညာရေးမှူးရုံး မှ တာဝန်ရှိသူတစ်ဦးမှပြောသည်။
ပြည်ခရိုင်အတွင်း ပထမအကြိမ်ရေကြီးနစ်မြုပ်ခဲ့စဉ်က စာသင်ကျောင်းပေါင်း ၁၂၂ ကျော်ပိတ်ထားခဲ့ရပြီ ယခုဒုတိယအကြိမ်ရေကြီးရေနစ်မြုပ်မှုများဖြစ်ပေါ်ခဲ့ရာတွင် စက်တင်ဘာ ၁၄ ရက်နေ့အထိ စာသင်ကျောင်းပေါင်း ၄၀ ကျော်ပိတ်ထားခဲ့လျှက်ရှိသည်။ ပြည်ခရိုင်အတွင်း စာသင်ကျောင်းပေါင်း ၁၀၆၈ ကျောင်းရှိပြီး ပြည်မြို့တွင် ၁၈၄ ကျောင်း၊ပေါက်ခေါင်းမြို့တွင် ၂၀၀ ကျောင်း ၊ ပန်းတောင်းမြို့တွင် ၁၅၇ ကျောင်း ၊ ပေါင်းတည်မြို့တွင် ၁၅၇ ကျောင်း၊ သဲကုန်းမြို့တွင် ၁၉၂ ကျောင်း နှင့် ရွှေတောင်မြို့တွင် ၁၇၈ ကျောင်းတည်ရှိသည်။ ပြည်မြို့ ဧရာဝတီမြစ်ရေပြင် စိုးရိမ်ရေအမှတ် ၂၉၀၀ စင်တီမီတာရှိရာတွင် စက်တင်ဘာ ၁၅ ရက်နေ့ နံနက် တိုင်းတာချက်အရ ၂၈၈၂ စင်တီမီတာမှာ မြစ်ရေတန့်လျှက်ရှိပြီး အဆိုပါမြစ်ရေပြန်လည်ကျဆင်းရန်အခြေအနေသို့ရှိကြောင်း ပြည်မိုးဇလရုံးတာဝန်ရှိသူများထံမှသိရသည်။
K3(pyay)ဒီမိုကရေစီတူဒေးသတင်းစာ
Wednesday, September 16, 2015
ပည်ခရိုင်အတွင်း စာသင်ကျောင်းပေါင်း ၄၀ ကျော်ရေကြီးနစ်မြုပ်၍ ယာယီပိတ်ထားလျှက်ရှိနေ
0 comments:
Post a Comment