ပြည်၊ဒီဇင်ဘာ၊၂၃
ပဲခူးတိုင်းဒေသကြီး ပြည်ခရိုင် ပြည်မြို့နယ် မှော်ဇာအုပ်စု တောင်လုံးညိုကျေးရွာတွင် နေအိမ်တစ်အိမ်တွင် ရှေးဟောင်းပတ္တမြား တွေ့ရှိသည်ဆိုကာ ရှေးဟောင်းဌာနသို့ အပ်နှံလိုက်ရာ ကျပ်သိန်းခြောက်ထောင် ရရှိခဲ့သည်ဆိုသော လူမှု့ကွန်ယက်စာမျက်နှာ(Facebook)တွင်ပျံ့နှံ့လျှက်ရှိသည့် သတင်းမှာ သတင်းအမှားဖြစ်နေပြီး သရေခေတ္တရာ ရှေးဟောင်းသုတေသနဌာနသို့ အဆိုပါ ပတ္တမြားလာရောက်အပ်နှံခြင်းမရှိကြောင်း သရေခေတ္တရာ ရှေးဟောင်းသုတေသနဌာန တာဝန်ရှိသူ တစ်ဦးထံကသိရသည်။
အဆိုပါ သရေခေတ္တရာ ပျူမြို့ဟောင်းအနီးတည်ရှိသည့် မှော်ဇာအုပ်စု တောင်လုံးညိုကျေးရွာတွင် တွေ့ရှိခဲ့သည့် ပစ္စည်းမှာ အလှဆင်ဖန်စီပစ္စည်းတစ်ခုသာဖြစ်ကြောင်း မှော်ဇာကျေးရွာအုပ်စု အုပ်ချုပ်ရေးမှူး က ယခုလိုပြောကြားခဲ့သည်။
‘‘အဲဒီအိမ်က အိမ်ပြင်ဆောက်တဲ့အခါ မြစ်ထဲကသဲကို ၀ယ်ပြီး သူ့အိမ်မှာ ပုံထားတယ်။ မုန်လာဥ တွေ ရေဆေးတော့ ရေက သဲပုံထဲစီးဝင်ပြီး အခုနာမည်ကြီးနေတဲ့ ပစ္စည်းလေးတစ်ခုတွေ့တယ်။ မြစ်သဲတွေထဲက ပါလာတာလို့ ယူဆရတယ်။ ရှေးဟောင်းက တာဝန်ရှိသူတွေ လာကြည့်သွားခဲ့ကြတယ်။ ရှေးခေတ်လက်ရာ မဟုတ်ဘူးလို့ ပြောတယ်။ အခုခေတ် ဆံထိုးတွေ နောက်မှာပါတတ်တဲ့ ချက်ကျောက်နဲ့ လုပ်ထားတဲ့ ဖန်စီပစ္စည်းလို့မှတ်ချက်ပေးသွားကြပါတယ်။ ’’ဟု မှော်ဇာကျေးရွာအုပ်စု အုပ်ချုပ်ရေးမှူး ဦးအေးထွန်းက ပြောသည်။
အဆိုပါ လူမှုကွန်ယက်စာမျက်နှာပေါ်တွင် နာမည်ကြီးခဲ့သည့် ကျောက်သည် ပြီးခဲ့သည့် နိုဝင်ဘာလအတွင်းက သရေခေတ္တရာရှေးဟောင်းဇုန် မှော်ဇာအုပ်စုရှိ တောင်လုံးညို ရွာ၏ နေအိမ်တစ်အိမ်တွင် မုန် လာဥများအား ရေဆေးစဉ် သဲပုံအတွင်း ပတ္တမြားအရောင် ကျောက်ငါးလုံးပါ ပစ္စည်းတစ်ခုကို တွေ့ရှိခဲ့ခြင်းဖြစ်ကြောင်း တောင်လုံး ညိုရွာဒေသခံများထံကသိရသည်။
‘‘အဲဒီပစ္စည်း တွေ့တာဖြင့် တစ်လလောက်တောင် ရှိနေပြီ။ အခုမှထပြီး ပတ္တမြားတွေ့လို့ ရှေး ဟောင်းကို အပ်လိုက်တာ သိန်း တစ်ထောင်ကျော်ရတယ်လို့ သတင်းစထွက်တယ်။ ပြီးတော့ ဖေ့စ်ဘွတ်ခ်မှာကျတော့ သိန်းခြောက်ထောင် ဆိုပြီး သတင်းပြန့်နေတယ်။ အခုနောက်ဆုံးကြားရတာကတော့ သူတို့ထိုက်လို့ သူတို့ရတာ ရှေးဟောင်းအပ်လိုက်တာ သိန်းတစ်ရာ့ခြောက်ဆယ်ရတာ တကယ်ပါဆိုပြီး သတင်းတွေ ပြန့်နေပြန်ရော။ ဒါကလည်း ယုံကြည်စရာအကြောင်းတွေက ရှိခဲ့ဘူးတယ်။ ဘာဖြစ်လို့လဲဆိုတော့ အဲဒီ ရှေး ဟောင်းဇုန်ကြီးအတွင်း နေထိုင်သူတွေဟာ လယ်ယာထွန်ယက် ရင်း အလုပ်လုပ်ရင်း ရွှေလင်ပန်း တွေ၊ ရှေးဟောင်းပစ္စည်းတွေ တကယ်တွေ့ပြီး ရရှိခဲ့တာကြောင့် ပဲ။ ဒါပေမဲ့အခုပေါ်နေတဲ့ သတင်းက မဟုတ်ပါဘူး။ ဖန်စီကျောက်လို့ပါ။ ’’ ဟု ပြည်မြို့ မှော်ဇာကျေးရွာအုပ်စုတွင်နေထိုင်သူ ဒေသခံ ဦးမြင့်သိန်းက ပြောသည်။
အဆိုပါ ပတ္တမြားကျောက်သည် ပြီးခဲ့သည့် နိုဝင်ဘာလအတွင်းမှာ လူမှုကွန်ယက်စာမျက်နှာမှတဆင့် စတင်ပြောဆိုရေးသားမှုများရှိနေခဲ့ပြီး ဒီဇင်ဘာ ၂၃ ရက်နေ့အထိ ပြည်မြို့နယ်အတွင်း လူစည်ကားရာနေရာတွေမှာ ရှေးဟောင်းသုတေသနသို့ သွားရောက်အပ်နှံခဲ့ရာမှာ သိန်းပေါင်းခြောက်ထောင် ရရှိခဲ့သည်ဆိုသောစကားမှာပျံ့နှံ့လျှက်ရှိနေကြောင်းသိရသည်။ အဆိုပါ ပတ္တမြားကျောက်အား သရေခေတ္တရာရှေးဟောင်းသုတေသနအဖွဲ့သို့ မည်သူတစ်ဦးတစ်ယောက်မှ လာရောက်အပ်နှံတာမရှိကြောင်း သရေခေတ္တရာ ရှေးဟောင်းသုတေသနအဖွဲ့ တာဝန်ရှိသူများထံမှသိရသည်။
K3(pyay)
0 comments:
Post a Comment