တောင်ဖြိုမြေတူးသူများနဲ့ ပြည်မြို့ အုပ်ချုပ်ရေးမှူး ကောင်းမြတ်မင်း ဧရာဝတီ

တောင်ဖြိုမြေတူးသူများနဲ့ ပြည်မြို့ အုပ်ချုပ်ရေးမှူး

တောင်တလုံးလုံးကို ကိတ်မုန့်လှီးသလိုလှီးပြီး မြေတွေကို တခြားနေရာမှာ ပြန်လည် အသုံးချနေတာကို ပြည်မြို့နယ်အနီးတဝိုက်မှာ   တရားဝင်တားမြစ်ထားပါတယ်။ 

အဲဒိလိုတားမြစ်ချက်တွေကတော့ ကားလမ်းမဘေးဘီဝဲယာမှာ လူမြင်သူမြင်ရှိတဲ့နေရာတွေမှာသာ သက်ရောက်နေသလိုပါပဲ။ 

ဘာကြောင့်လဲ ဆိုတော့ လူမြင်သူမြင်မရှိတဲ့နေရာတွေမှာလည်း ခိုးကြောင်းခိုးဝှက်နဲ့ တောင်ဖြို မြေတူးမှုတွေ လုပ်နေခြင်းကြောင့်ပါ။

ပြည်မြို့နယ် အတွင်းရှိ ရန်ကုန်-ပြည် ကားလမ်းမဘေးနဲ့ အရေးပေါ်လမ်းအနီးရှိ

 တောင်များကို မြေတူး၊
မြေကော်စက်ကြီးတွေနဲ့ တောင်ဖြိုမြေယူမှုတွေကြောင့်  သဘာဝပတ်ဝန်းကျင်ကိုထိခိုက်နိုင်တဲ့အတွက်
 ပြီးခဲ့တဲ့ အပတ်ထဲမှာပဲ မြို့နယ် မြေယာစီမံခန့်ခွဲရေးကော်မတီက လုပ်ငန်းရှင်သုံးဦးကို မြေတူးဖေါ်တာတွေ  ရပ်ဆိုင်းဖို့  တရားဝင် ဟန့်တားခဲ့ပါတယ်။

 ဒါ[ာ  တစုံတယောက်က တိုင်ကြားလို့ တားမြစ်ခဲ့တာမဟုတ်ဘဲ၊ ကိုယ်တိုင်မြင်တွေခဲ့ရလို့ အမြန်ဆုံး တားမြစ်စာထုတ်ခဲ့ရတာဖြစ်တယ်လို့ ပြည်မြို့နယ်  အုပ်ချုပ်ရေးမှူး ဦးအောင်အောင်က ဧရာဝတီကို ပြောပါတယ်။

            “မြေတူးစက်တွေနဲ့ တောင်တွေကို ဖဲ့နေတာမြင့်တော့ တော်တော် လန့်သွားတယ်။
အဲဒါနဲ့ မလှမ်းမကမ်းမှာ ဓါတ်အားပေးလိုင်း တာဝါတိုင်ကြီးတွေ ရှိတယ်။ 
တော်တော် အန္တရာယ်များတဲ့ ကိစ္စကို ဘယ်သူ့ဆီမှာမှ ခွင့်မတောင်းဘဲနဲ့ အများပြည်သူ အန္တရာယ် ကျရောက်အောင် လက်ရဲဇက်ရဲလုပ်နေတာ။ 
အကွက်ပိုင်ရှင်တွေကို တရားဝင်တားမြစ်စာ ထုတ်ခဲ့တာ”

လုပ်ငန်းရှင်တွေကတော့ သူတို့ အလုပ်ဖြစ်ရေးအတွက် နည်းလမ်းမျိုးစုံသုံးဖို့ အဆင်သင့် ဖြစ်နေပုံကိုလည်း အုပ်ချုပ်ရေးမှူးက ပြန်လည် ဖောက်သည်ချပါတယ်။

“အဲဒါကို တယောက်က ကျွန်းစိုက်ခင်းအတွက် မြေဖြိုတာပါ၊ ဖြို့ခွင့်ပြုပါ ဆိုပြီး စာပြန်တင်ထားသေးတယ်။ 
ကျွန်းစိုက်တာတောင် မဖြိုဘဲ စိုက်လို့ရတယ်။ ဒါ သဘာဝပတ်ဝန်းကျင် ပျက်ဆီးတာပေါ့ဗျာ”

            အဲဒီလို တားမြစ်နေပေမဲ့ ရန်ကုန်- ပြည် အဝေးပြေးကားလမ်းမကနေ ၃ ဖာလုံလောက်အကွာမှာ ရှိတဲ့  အောင်မြေကျေးရွာက တောင်ကြီးတွေကို ဖြိုပြီး မြေညှိမြေယူလုပ်နေတဲ့သူတွေလည်း ရှိနေပါသေးတယ်။

သူတို့ လုပ်ပုံကိုင်ပုံကိုလည်း အောင်မြေကျေးရွာကဒေသခံတဦးက လိုတိုရှင်း ရှင်းပြပါတယ်။ 

“ အရင်က အဲဒီတောင်အပေါ်ကနေ တာဝါတိုင်က ဓါတ်ကြိုးတွေကိုထိဖို့ဆို ၁၅ ပေလောက်ပဲ ရှိမယ်။ 
အခု သူတို့ ဖဲ့ချထားတာပေ ၁၀၀ ကျော်ဖြစ်တဲ့အထိ သူတို့ တူးပစ်လိုက်ကြတာ မြင်တဲ့အတိုင်းပဲ။  အဲဒီ တောင်ကြီး မြေညီသွားရင် အိမ်ယာကွက်တွေ လုပ်မယ်။
  လျှပ်စစ်မီးကိုလည်း လျှောက်မယ်။  ရွာက သုံးပုံပုံရင် တပုံစာ တာဝန်ယူ၊ ကျန်တဲ့ နှစ်ပုံ ငါတို့တာဝန်ယူမယ်ဆိုပြီး ရွာသားတွေနဲ့ လာညှိဖူးတယ်။
 ဘာလုပ်မယ်တော့ သေသေချာချာ မပြောဘူး”

တောင်ဖြိုတဲ့အတွက် ကိုယ်လုပ်ချင်တာတွေ လုပ်ဖို့ အဆင်ပြေသွားတယ်လို့ ဆိုချင် ဆိုနိုင်ပါတယ်။
သို့သော်လည်း သဘာဝပတ်ဝန်းကျင် အပြောင်းအလဲ ဘယ်လောက်အထိ ကြီးမားသလဲ ဆိုတာကိုတော့ ထည့်တွက်ချင်မှ တွက်ပါလိမ့်မယ်။

 ပြည်မြို့နယ်  အုပ်ချုပ်ရေးမှူး ဦးအောင်အောင်ကတော့ သူ့ရဲ့ စီမံမှုဒေသအတွင်း  တောင်ဖြိုမြေယူမှုတွေကို  ဟန့်တားသွားမယ် လို့ ဆက်ပြောပါတယ်။

            “အောင်မြေဘက်မှာ တောင်ဖြိုနေတယ်ဆိုတာ ကျနော် မသိသေးပါဘူး။
 အဲဒီ ဒေသက အုပ်ချုပ်ရေးမှူးတွေကလည်း ဒါကို လုပ်လို့ ရလုပ်တယ်လို့ ထင်ပြီး ကျနော့်ကို သတင်းမပို့တာလည်း ဖြစ်နိုင်တယ်။
 ကျနော်သွားပြီး အမြန်ဆုံး တားမြစ်မှာပါ”

လုပ်ငန်းရှင်တွေက ရှေ့ဆက်တိုးရင် ဘယ်လိုလုပ်မလဲ??

 “တားမြစ်နေတဲ့ ကြားက ဆက်လုပ်နေရင်တော့ ၂၀၁၂ လယ်ယာမြေဥပဒေအရ အရေးယူသွားမယ်” လို့    အုပ်ချုပ်ရေးမှူး ဦးအောင်အောင်က ပြောပါတယ်။

 ကောင်းမြတ်မင်း  ဧရာဝတီ